使用條款 | 私隱政策

政府快抄橋 引入「聰明廚房」

連一向樂觀的政府都預告經濟衰退至少要捱幾季,做生意要諗出路真係頭都大。幸好Uber創辦人已為大家提供商機貼士,就係在香港搞「聰明廚房」。

「聰明廚房」概念好簡單:租工廈單位搞個大廚房,配合外賣服務自製生產、運送一條龍服務。理論上呢條橋在食肆密集的香港應該行不通,但現在香港的城市生態,正好為呢盤生意提供上佳土壤。

近來日常生活其中一大難題係出街食飯風險,退而求其次就唯有幫襯外賣App,所以身穿風褸的外賣員在街頭越來越活躍。當大家習慣叫外賣,甚至淡忘了出街食樂趣,具規模的外賣企業就有條件大搞「聰明廚房」。

自己搞「聰明廚房」有兩大好處,一係慳返外賣員落舖拎食物及與食肆拆數成本,而且經濟衰退工廈租務較淡靜,在各區亦較易搵地方搞「聰明廚房」。二係中央廚房勝在「離地」,相對地舖食肆被「化學嘢」吹襲風險細得多,對顧客而言又多一個安心賣點。

至於食物質素,都市人都明白由連鎖食肆到小店,不少食材未又係出自中央廚房的半製成品,所以「聰明廚房」只要選擇夠多味道正常,還有準時送達,而且價錢較地舖食肆平一截,相信會有不少顧客樂意幫襯。

聽起來算盤打得響,不過「聰明廚房」亦有一大隱憂,就係當外賣App打開呢條戰線後,或會吸引更多具實力競爭對手加入戰團。例如本身已有中央廚房的快餐集團,執了大堆分店後,自然有大把條件運用生產力拓展「聰明廚房」戰線,例如偶爾要休息的美心,不如聯營波仔,組個外賣聯盟。

更厲害的強敵可能係航空公司,假如航班一縮再縮,飛機餐訂單唔見大半,就不如把心一橫把旗下飛機餐工場改為生產高級外賣餐,再出動空姐空少兼任外賣員,單是這賣點已足以轟動全港「爆單」,效果隨時媲美當年魔童廣告。

假如「聰明廚房」幫本地經濟突破缺口,來年政府可能都要諗諗係咪要向Uber創辦人頒個乜乜襟章,再順手同創辦人斟斟,有無得搞個政府版callapp,客運貨運一條龍,提供子彈予Travis Kalanick打舊公司,可謂一石多鳥,總好過頒來頒去都係塞畀黎明吧。

===============

精選資訊網站「中環街市」  臉書粉絲頁

最近的19+幾樣野

Uber Eats預測:明年流行20種食物

中國包圍網?

區選與樓市

渡輪等翻生

海底撈的隱憂

政府快抄橋 引入「聰明廚房」

Uber創辦人東山再起

怡和應否放棄美心

TVB要靠叻哥打救

Amazon公開的 6個小生意