使用條款 | 私隱政策

日本7仔變「真7-11」 加盟商逼宮有用

日本7仔算係大數據銷售先鋒,不過掀起零售革命的掌舵人鈴木敏文年前在權力角力中敗陣兼引退,巧合地之後日本便利店業就陷入衰退期,甚至日本7仔都要跟隨對手Lawson,先在十間直營店試行朝七晚十一營業時間。

觸發今次日本7仔「真7-11」變革,係源於加盟商向總部逼宮,控訴請唔到人又受制於全日營業硬規定,唯有由加盟商小老闆親身上陣捱足十幾小時,長年非人生活實在頂唔順,終於有一名大阪加盟商小老闆自行縮短營業時間被總公司指他違約,因而引發加盟商小老闆齊齊向總公司講數,最後就決定先以分布八個縣市的十間直營店作試點,了解縮短營業時間對盈利的影響。作為加盟商,如果可以開通頂當然盡做,但現時日本勞動人口兩大後備軍長者及家庭主婦,他們對返夜班及便利店較複雜營運模式頗抗拒,另一後備軍外勞,又會優先選擇願意出高薪的建造業及飲食業,所以便利店加盟商小老闆即使提高時薪,仍難以請到足夠夜班員工。

以母企7&I控股規模,只要證明縮短營業時間對盈利衝擊有限,應會放手一試。皆因7&I控股尚有大把業務收入補貼,如去年盈利增長超預期,就主要靠美國7仔業務貢獻。

至於下一步,既然日本7仔近年透過網店了解顧客喜好再調整上架貨品組合的做法,不排除會參考Amazon做法,加快拓展無人便利店,事實上對手Laswon已積極推動無人店業務。日本係自動販賣機大國,按理應該較容易接受無人店形式。

另一可能係趁便利店業務有價有市時分拆上市或與其他便利店品牌合併,前者好處係先利套現,後者則可以整合分店網絡,例如同一條街不同品牌有四間縮為兩間,人力需求就減一半。當然如果行這一步,受苦的又係加盟商小老闆,似乎不論香港及日本,做便利店特許經營者都係悲情生意。

講返轉頭香港其實部份7仔都唔係通宵營業,一早已經因時制宜,足見香港做生意靈活的一面。

===============

精選資訊網站「中環街市」  臉書粉絲頁

最近的19+幾樣野

大馬會更中國化?

央企全面進軍香港 什麼股最受惠?

騰任合作也許快來了

盤點英國資產狙擊手大輸家

蘋果首次跟華為比較

馬雲的七張名片

新iPhone將登場 傳不支援5G

上海Costco爆退卡潮

Prada何必再捱業主貴租

上海外資零售 開始再發力