Uniqlo用人魔法 思捷可以複製嗎?

當多個一線Fast Fashion品牌盈利被網購衝擊時,Uniqlo母企迅銷中期業績仍然亮麗,集團更預計全年收益總額可達2.1萬億日圓。Uniqlo能夠抵禦網購來襲,除了得力於價平料靚,另一關鍵係集團的用人魔法,精準地利用落難潮人的本事,鞏固產品線的吸引力。

第一位落難潮人係Bathing Ape創辦人Nigo,這名曾幾何時被譽為潮流教父的人物,經歷親手將自家品牌售予I.T集團,又要把多年珍藏潮物拍賣套現,最後重投職場加入Uniqlo擔任UT創意總監。經過數年UT的系列,證明Nigo多年來儲下的人脈含金量極高,聯乘對象可以由京都老店永樂屋到漫畫巨企集英社,確保UT持續成為Uniqlo在夏季的現金牛。

第二位落難潮人同樣傳奇,他便是被譽為全日本最識著衫中佬、《Popeye》前總編木下孝浩,他本來於今年一月被「貶」去出版社的總務部,據悉原因是他堅拒把雜誌數碼化,到51日迅銷就公布木下孝浩將加入Uniqlo,負擔營銷推廣工作。迅銷首領柳井正特別提到全球化趨勢下,「編輯」這角色是絕對重要。牌面睇似乎係看中木下孝浩在打造品牌形象、宣傳及項目管理上的本事,但心水清的朋友都知道,木下孝浩貴為都會休閒風打扮權威,今後Uniqlo的男裝系列有他幫下眼,已經是信心保證,功能就如由Nigo監修的T恤系列。

單係人事任命已引起潮流界轟動,可見Uniqlo的用人魔法威力。環顧本地服裝股,最需要高人打救一定係思捷。技術上要複製Uniqlo方程式,T恤系列可以找內地市場仍有相當人氣的陳冠希擔任總監。至於休閒服系列,首選人物是與木下孝浩背景、技能相近,曾擔任《號外》總編、同樣被標籤為傳媒界首席型男中佬黃源順。

不過要複製Uniqlo用人魔法,單有人才並不足夠,關鍵係企業首領的膽色及眼光。現在思捷由資源銀行家柯大俠掌舵,看他今年的動作,明顯都是求穩陣越做越縮,相信他都不太願意在用人及重建品牌上作出豪賭投資。有本錢作類似嘗試的服裝股反而係差一點被Uniqlo收購的佐丹奴,所以搞成衣管理用人要破格,既要看企業首領的膽色,更要看企業本身底子是否輸得起,否則還是回歸守勢,繼續等人出新款照抄便算了。

===============

財經精選資訊網站「中環街市」  臉書粉絲頁

最近的19+幾樣野

旺角行人專用區快成集體回憶?(黃漢成)

港股會否引入「送禮文化」?

【總結貿易戰】特朗普不想中國急起直追(奧雲)

400萬去美國買樓 買到啲乜?

香港要靠業主發展創科(石先生)

新地點解咁勇

中國人未富先老

百佳會唔會輸俾王維基

Uniqlo用人魔法 思捷可以複製嗎?

【深圳彩訊】香港職位 再現北移現象